ᐊᑐᐃᓐᓇᖃᖅᑎᑦᑎᓂᖅ ᒪᓕᒐᓕᕆᓂᕐᒥᒃ ᐱᓕᕆᐊᑦ
ᐱᓕᕆᔪᒪᓂᖃᓪᓚᑦᑖᕐᓂᖅ ᐊᒃᑐᐊᖃᑎᒌᓕᖅᑎᑦᑎᓗᑎᒃ ᐊᒻᒪ ᐊᑐᕐᓗᓂᔾᔪᒃ ᑲᑐᔾᔨᖃᑎᖃᕐᓂᕐᒧᑦ ᐊᑐᖅᑕᐅᓇᓱᐊᖅᑐᑦ ᑭᐅᑦᑎᐊᕈᓐᓇᕐᓂᖅᓴᐅᖁᓪᓗᒋᑦ ᒪᓕᒐᖅᑎᒍᑦ ᑭᙴᒪᒋᔭᐅᔪᓂᒃ ᐱᔪᒥᒋᔭᐅᔪᓂᓪᓗ ᓄᓇᕗᒻᒥᐅᓗᒃᑖᓄᑦ.
ᑖᒃᑯᐊ ᒪᓕᒐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕘᒥ ᐱᓕᕆᔪᒪᓂᖃᓪᓚᑦᑖᖅᑐᑦ ᐊᒃᑐᐊᖃᑎᒌᓕᖅᑎᓪᓗᒋᑦ ᓄᓇᕗᒻᒥᐅᑦ ᐊᒃᑐᐊᓂᓕᖕᓄᑦ ᐃᑲᔫᑎᒃᓴᓄᑦ ᑐᑭᓯᒋᐊᕈᑎᓄᓪᓗ ᐃᑲᔪᖁᓪᓗᒋᑦ ᑐᑭᓯᒃᑲᓐᓂᐅᔭᕐᓗᒋᑦ ᐱᔪᓐᓇᐅᑎᖏᑦ ᐊᒻᒪ ᒪᓕᒐᖅᑎᒍᑦ ᐃᑲᔪᖅᑕᐅᓗᑎᒃ ᑭᙴᒪᒋᔭᖏᓐᓄᑦ. ᑕᒪᓐᓇ ᑎᑭᑕᐅᔪᓐᓇᕐᓂᐊᖅᑐᑦ ᐊᑐᐃᓐᓇᐅᑎᑦᑎᓗᑎᒃ ᐊᑐᕈᓐᓇᕐᓂᕐᒥᒃ ᐃᓄᓕᒫᑦ ᒪᓕᒐᖅᑎᒍᑦ ᐃᓕᓐᓂᐊᖅᑎᑕᐅᓗᑎᒃ ᐊᒻᒪ ᑐᑭᓯᒋᐊᕈᑎᒃᓴᓄᑦ ᐃᑲᔫᑎᒃᓴᑎᖑᑦ, ᐊᒻᒪᓗᑦᑕᐅᖅ ᐱᓕᕆᐊᖃᕐᓗᑎᒃ ᖃᐅᔨᓴᕐᓂᕐᒥᒃ ᐊᒻᒪ ᐃᓄᓕᒫᑦ ᐅᔾᔨᕈᓱᓕᖁᓪᓗᒋᑦ ᐱᓕᕆᓃᑦ ᐱᔾᔪᑎᒋᓪᓗᒋᑦ ᒪᓕᒐᖅᑎᒍᑦ ᐱᒋᐊᖅᑕᐅᔪᒪᔪᑦ ᐊᒃᑐᐊᓂᓖᑦ ᓄᓇᕗᒻᒥᐅᓄᑦ. ᐋᖅᑭᒃᓱᐃᕙᓪᓕᐊᓗᑎᒃ ᑐᙵᕕᖕᓂᒃ ᐋᖅᑭᒃᓱᖅᑕᐅᓯᒪᔪᓂᒃ ᐊᑐᐃᓐᓇᖃᖅᑎᑦᑎᓂᖅ ᒪᓕᒐᓕᕆᓂᕐᒥᒃ ᖃᐅᔨᒪᓂᕐᒧᑦ ᐱᒋᐊᖅᑕᐅᔪᒪᔪᑦ, ᑖᓐᓇ , ᐊᑐᐃᓐᓇᖃᖅᑎᑦᑎᓂᖅ ᒪᓕᒐᓕᕆᓂᕐᒥᒃ ᐱᓕᕆᐊᖅ, ᓴᖅᑭᑕᐅᓚᐅᖅᑐᖅ 2015-ᒥ, ᐃᑲᔪᖅᑐᖅᑕᐅᓇᓱᐊᖅᖢᑎᒃ ᑕᒪᒃᑯᐊ ᐱᓕᕆᓃᑦ ᐊᑐᕐᓗᒋᑦ ᐊᐅᓚᑦᑎᓃᑦ ᐱᓕᕆᐊᖏᓐᓂ ᐊᒻᒪ ᐱᒋᐊᖅᑕᐅᔪᒪᔪᓪᓗ.
ᐃᓚᒌᓂᒃ ᐋᓐᓂᖅᓱᖃᑦᑕᐅᑎᑦᑕᐃᓕᒪᓂᖅ
ᑮᓇᐅᔭᖃᖅᑎᑕᐅᔪᑦ ᒐᕙᒪᖏᓐᓂ ᓄᓇᕘᒻᒥ
ᑐᕌᒐᖅ ᑕᒪᑐᒧᖓ ᐱᓕᕆᐊᒧᑦ ᓂᐱᖃᙱᑦᑐᓐᓃᕐᓗᑎᒃ ᑕᒪᑐᒧᖓ ᐃᓚᒌᑦ ᐋᓐᓂᖅᓯᖅᑕᐅᖃᑦᑕᕐᓂᖏᓐᓄᑦ ᓄᓇᕗᒻᒥ. ᕿᓂᖅᑐᑦ ᑕᒪᐃᓐᓂᒃ ᑐᑭᓯᑦᑎᐊᒃᑲᓐᓂᕈᒪᓪᓗᑎᒃ ᐊᑲᐅᙱᓕᐅᕈᑎᒥᒃ ᐃᓚᒌᑦ ᐋᓐᓂᖅᓯᖅᑕᐅᖃᑦᑕᕐᓂᖏᓐᓄᑦ ᐊᒻᒪ ᐃᑲᔪᖅᑐᐃᔪᒪᓪᓗᑎᒃ ᓄᓇᕗᒻᒥᐅᓂᒃ ᐊᑐᖅᓯᒪᔪᓂᒃ ᑕᐃᒪᐃᑦᑐᒥᒃ ᐅᕝᕙᓘᓐᓃᑦ ᖃᐅᔨᒪᒍᑎᒃ ᑭᓇᑐᐃᓐᓇᒥᒃ ᐊᑐᖅᓯᒪᔪᒥᒃ ᑕᐃᒪᐃᑦᑐᒥᒃ. ᑕᒪᓐᓇ ᐱᔭᕇᖅᑕᐅᔪᓐᓇᖅᑐᑦ ᐃᑲᔪᖅᑕᐅᓗᑎᒃ ᓄᓇᕗᒻᒥᐅᑦ ᐃᓕᓴᖅᓯᓗᑎᒃ ᐃᓚᒌᓂᒃ ᐋᓐᓂᖅᓯᖅᑕᐅᕙᒃᑐᓂᒃ ᐊᒻᒪ ᑐᑭᓯᑦᑎᐊᕐᓂᖅᓴᐅᓗᑎᒃ ᖃᓄᐃᓕᐅᕈᓐᓇᕐᒪᖔᑕ ᑕᒪᑐᒪ ᒥᒃᓵᓄᑦ. ᑐᕌᒐᕆᔭᐅᒃᑲᓐᓂᖅᑐᖅ ᑕᒪᑐᒥᖓ ᐱᓕᕆᐊᒥ ᑐᑭᓯᔪᒪᓪᓗᑎᒃ ᖃᓄᖅ ᐃᓚᒌᓂᒃ ᐋᓐᓂᖅᓱᐃᕆᕙᖕᓂᖅ ᓄᖅᑲᖅᑎᑦᑎᓂᕐᒧᑦ ᒪᓕᒐᖅ (FAIA) ᑭᓲᖕᒪᖔᑦ, ᑭᓲᙱᒻᒪᖔᓪᓘᓐᓃᑦ, ᑲᒪᒋᔭᐅᓗᑎᒃ ᑭᙴᒪᒋᔭᐅᔪᑦ ᑲᒪᒋᔭᐅᓕᕌᖓᑕ ᐃᓚᒌᑦ ᐋᓐᓂᖅᓯᖅᑕᐅᕙᒃᑐᑦ ᓄᓇᕗᒻᒥ.
ᐃᓚᒌᓂᑦ ᐋᓐᓂᖅᑎᕆᓂᕐᒥᑦ ᐃᑲᔪᖅᑕᐅᓂᕐᒧᑦ ᐱᓕᕆᐊᖅ – ᓴᓇᕐᕈᑏᑦ ᐊᒻᒪ ᐃᓕᓐᓂᐊᑎᑦᑎᓂᕐᒧᑦ
ᐅᖑᐃᒎᓪᓗᓂ ᑖᒃᑯᐊ ᒪᓕᒐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕘᒥ ᐃᓚᒌᓂᒃ ᐋᓐᓂᖅᓱᐃᕆᕙᖕᓂᖅ ᓄᖅᑲᖅᑎᑦᑎᓂᕐᒧᑦ ᒪᓕᒐᖅᑎᒍᑦ ᖃᐅᔨᓴᕐᓂᕐᒥ ᖃᐅᔨᓴᕐᓃᑦ ᐊᒻᒪ ᐅᔾᔨᕈᓱᓕᖅᑎᑦᑎᓂᕐᒧᑦ ᐱᓕᕆᓃᑦ, ᑕᒪᓐᓇ ᐱᒋᐊᖅᑕᐅᔪᒪᔪᖅ ᑐᕌᒐᖃᖅᑐᑦ ᓴᖅᑮᓂᐊᕐᓗᓂ ᖃᕆᓴᐅᔭᒃᑯᑦ-ᐃᑭᐊᖅᑭᕕᒃᑐᑦ ᐱᓕᒻᒪᒃᓴᓂᕐᒧᑦ ᐋᖅᑭᒃᓯᒪᔪᑦ ᓴᖅᑭᔮᖅᑎᑦᑎᓪᓗᑎᒃ ᐊᒃᑐᐊᓂᓕᖕᓂᒃ ᐃᓗᓕᖏᓐᓂᒃ, ᐃᑲᔫᑎᒃᓴᓂᒃ, ᐅᓂᒃᑳᓂᒃ, ᐊᒻᒪ ᐃᓕᓐᓂᐊᒐᒃᓴᓂᒃ ᑕᒪᐃᓐᓄᑦ ᐱᓕᕆᔨᓪᓚᑦᑖᓄᑦ ᐊᒻᒪ ᐃᓄᓕᒫᓄᑦ ᐅᖃᐅᓯᖃᖅᑎᓪᓗᒋᑦ ᐃᓚᒌᑦ ᐋᓐᓂᖅᓯᖅᑕᐅᖃᑦᑕᖁᓇᒋᑦ. ᐅᖃᐅᓯᒃᓴᐅᔪᑦ ᐱᓕᒻᒪᒃᓴᐃᔾᔪᑎᒥ ᐅᑯᐊ ᐱᖃᓯᐅᑎᓪᓗᒋᑦ: ᐊᑦᑕᕐᓇᖅᑕᐃᓕᒪᓂᒃᑯᑦ ᐸᕐᓇᐃᓂᖅ, ᑐᐊᕕᕐᓇᖅᑐᒃᑯᑦ ᓴᐳᔾᔭᐅᓯᒪᔾᔪᑏᑦ ᑎᓯᓕᔾᔪᑏᑦ, ᓄᓇᓕᖕᓂ ᐱᓕᕆᕝᕕᖃᖔᓕᕐᓂᕐᒧᑦ ᑎᓕᓯᔾᔪᑕᐅᔪᑦ, ᒪᓕᑲᑕᖕᓂᖅ, ᐃᓐᓇᐃᓪᓗ ᐱᓂᕐᓗᒡᕕᐅᕙᖕᓂᖏᓐᓄᑦ.
ᐱᓕᕆᔾᔪᑎ ᓴᖅᑭᑕᐅᓚᐅᖅᑐᑦ ᐅᐱᕐᖔᖓᓂ 2025 ᓇᔫᑎᓪᓗᑎᒃ ᐱᓕᒻᒪᒃᓴᑎᑦᑎᓪᓗᑎᒃ ᐃᖃᓗᖕᓂ ᑲᖏᖅᖠᓂᕐᒥᓗ.
ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ ᐊᑐᖅᑕᐅᑎᑦᑕᐃᓕᓗᒍ
ᑮᓇᐅᔭᖃᖅᑎᑕᐅᔪᑦ ᒐᕙᒪᖏᓐᓂ ᓄᓇᕘᒻᒥ
ᑕᒪᓐᓇ ᐱᓕᕆᐊᖅ ᑐᕌᒐᖃᖅᑐᖅ ᐅᔾᔨᕈᓱᓕᖅᑎᑦᑎᓇᓱᖕᓂᕐᒥᒃ ᐊᒻᒪ ᐊᑐᐃᓐᓇᐅᑎᓪᓗᖏᑦ ᐃᓄᓕᒫᓄᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᖅᑎᑕᐅᓃᑦ ᑕᒪᒃᑯᓄᖓ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᑎᑦᑎᑦᑕᐃᓕᒪᓃᑦ (GBV) ᐱᓪᓗᐊᑕᐅᓪᓗᓂ ᐊᑐᐊᒐᖅ ᐱᓕᕆᓂᕐᒧᑦ ᐱᑕᖃᓗᐊᖁᓇᒋᑦ ᐊᒻᒪ ᐃᑕᖃᖁᓇᒍᑦ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ (GBV). ᑐᕌᒐᐅᔪᖅ ᐊᓯᔾᔨᕐᓗᒋᑦ ᐃᓅᖃᑎᒌᖕᓂᕐᒧᑦ ᓱᖏᐅᑎᔭᐅᓯᒪᔪᑦ, ᐃᓕᖅᑯᓯᕆᔭᐅᔪᑦ, ᐃᓕᖅᑯᓰᓪᓗ, ᑲᒪᒋᔭᐅᑎᓪᓗᒋᑦ ᐱᔾᔪᑎᓪᓚᑦᑕᑦ ᐊᒻᒪ ᐅᓗᕆᐊᓇᕈᓐᓇᕐᓂᖓᓄᑦ ᐃᔾᒧᑕᐅᔪᑦ ᑕᒪᑐᒧᖓ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ (GBV) ᐃᓱᓕᖁᓪᓗᒋᑦ ᓱᕋᐃᓂᓪᓚᑦᑖᖅ ᐊᒃᑐᐃᓃᑦ. ᑖᒃᑯᐊ ᒪᓕᒐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕘᒥ ᑲᒪᒋᔭᖃᕐᓂᐊᖅᑐᑦ ᐱᓕᕆᓂᕐᓂᒃ ᑲᑎᖁᓪᓗᒋᑦ ᐊᔾᔨᒌᙱᑦᑐᑦ ᓄᓇᕗᒻᒥ ᑎᒥᐅᔪᑦ – ᑕᒪᐃᓐᓂᒃ ᐊᒃᑐᐊᓂᖃᓪᓚᑦᑖᖅᑐᑦ ᐊᒃᑐᐊᓂᖃᓪᓚᑦᑖᙱᑦᑑᒐᓗᐊᓪᓗ ᐋᓐᓂᖅᓯᕆᓂᖅᑕᖃᖁᓇᒍ – ᑲᑐᔾᔨᖃᑎᒌᖕᓂᒃᑯᑦ ᐅᔾᔨᕈᓱᓕᖅᑎᑦᑎᓂᒃᑯᑦ ᐊᒻᒪ ᑐᑭᓯᒋᐊᕈᑎᓂᒃ ᑐᓴᐅᒪᖃᑎᒌᖕᓂᒃᑯᑦ.
ᐊᑐᐃᓐᓇᖃᖅᑎᑦᑎᓂᖅ ᒪᓕᒐᓕᕆᓂᕐᒥᒃ (A2J) ᓄᓇᓕᖕᓄᑦ ᓂᐅᕐᕈᑲᑕᖕᓂᖅ
ᐊᑐᐃᓐᓇᖃᖅᑎᑦᑎᓂᖅ ᒪᓕᒐᓕᕆᓂᕐᒥᒃ ᓄᓇᓕᖕᓄᑦ ᓂᐅᕐᕈᑲᑕᖕᓂᒃᑯᑦ, ᐊᒃᑎᐊᖃᑎᖃᓕᖅᓯᒪᔪᒍᑦ ᒪᓕᒐᓕᕆᓂᕐᒥ ᓄᓇᓕᖕᓂ ᓄᓇᕗᓗᒃᑖᒥ ᐱᔪᒥᓴᖅᑕᐅᖁᓪᓗᒍ ᒪᓕᒐᓕᕆᓂᕐᒧᑦ ᐃᓕᓐᓂᐊᖅᑎᑦᑎᓂᖅ ᐊᒻᒪ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ (GBV) ᐊᑐᖅᑕᐅᑦᑕᐃᓕᖁᓪᓗᒋᑦ. ᑕᒪᓐᓇ ᐱᖃᓯᐅᔾᔨᔪᖅ ᐃᓚᐅᑎᑦᑎᓂᕐᒥᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᖕᒥ ᐱᓕᕆᓂᕐᓂ ᐊᒻᒪ ᐱᙳᐊᖅᑎᑦᑎᓗᑎᒃ ᐃᖅᑲᖅᑐᐃᕝᕕᒃᑰᙳᐊᕐᓗᑎᒃ ᐊᑐᐃᓐᓇᐅᑎᑦᑎᓂᕐᓗ ᐃᓄᓕᒫᓄᑦ ᒪᓕᒐᓕᕆᓂᕐᒧᑦ ᑐᑭᓯᒋᐊᕈᑎᓂᒃ ᐃᓕᓐᓂᐊᕐᓗᑎᒃ ᑲᑎᒪᓗᑎᒃ.
2024-ᒥ, ᑖᒃᑯᐊ ᒪᓕᒐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕘᒥ ᐊᒻᒪ ᐱᓕᕆᖃᑎᕗᑦ ᐃᓚᐅᑎᑦᑎᓚᐅᖅᑐᑦ ᐅᖓᑖᓂ 1,000 ᓄᓇᕗᒻᒥᐅᓂᒃ ᐊᑐᐃᓐᓇᐅᑎᑦᑎᓪᓗᑎᒃ ᐃᓄᓕᒫᓄᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᓂᕐᒥᒃ ᐊᒻᒪ ᑐᑭᓯᒋᐊᕐᓂᕐᒥᒃ (PLEI) ᐃᓕᓐᓂᐊᕐᓗᑎᒃ ᑲᑎᒪᓗᑎᒃ, ᒪᓕᒐᓕᕆᓂᕐᒧᑦ ᐅᖃᐅᔾᔨᒋᐊᕐᓃᑦ, ᒪᒃᑯᒃᑐᓄᑦ-ᑐᕌᖓᔪᑦ ᐱᓕᕆᓃᑦ, ᐊᒻᒪ ᐱᙳᐊᖅᑎᑦᑎᓗᑎᒃ ᐃᖅᑲᖅᑐᐃᕝᕕᒃᑰᙳᐊᕐᓗᑎᒃ ᓄᓇᓕᖕᓂ ᑲᖏᖅᖠᓂᕐᒥ, ᖃᒪᓂᑦᑐᐊᒥ, ᐃᖃᓗᒃᑑᑦᑎᐊᒥ, ᐅᖅᓱᖅᑑᒥ, ᒥᑦᑎᒪᑕᓕᖕᒥ ᐊᒻᒪ ᐃᒃᐱᐊᕐᔪᖕᒥ.
ᖁᕕᐊᓱᒃᑐᒍᑦ ᐅᓄᖅᓯᒋᐊᕆᔭᕆᐊᒃᓴᖅ ᑎᑭᐅᑎᓪᓗᑎᒃ ᐅᓄᕐᓂᖅᓴᓄᑦ ᓄᓇᓕᖕᓄᑦ, ᐃᑲᔪᖅᑐᐃᖏᓐᓇᖅᖢᑎᒃ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ (GBV) ᐊᑐᖅᑕᐅᑦᑕᐃᓕᖁᓪᓗᒋᑦ, ᐊᒻᒪ ᓴᖅᑮᓪᓗᑎᒃ ᐊᑐᕈᓐᓇᕐᓂᖅᓴᐅᓕᕐᓗᑎᒃ ᒪᓕᒐᓕᕆᓂᖅᑎᖑᑦ ᑐᑭᓯᒋᐊᕈᑎᓂᒃ ᐊᒻᒪ ᐃᑲᔪᖅᑐᖅᑕᐅᓃᑦ ᓄᓇᕗᒻᒥᐅᓕᒫᓄᑦ.
ᐱᓕᕆᔾᔪᑎᒃᓴᓂᒃ ᐊᔪᕆᒃᓯᐅᔾᔨᓯᒪᔪᑦ
ᐱᑕᖃᑦᑎᐊᖏᓐᓂᖓᓄᑦ ᓱᖅᑯᐃᓇᑦᑎᐊᖅᑐᓂᒃ ᑐᓴᐅᒪᖃᑎᒌᖕᓂᕐᒧᑦ ᐊᖅᑯᑕᐅᔪᓐᓇᖅᑐᓂᒃ ᑖᒃᑯᓇᓂ ᐱᔨᑦᑎᕋᖅᑎᓂ, ᑎᑭᐅᑎᓯᒪᔪᖅ ᐊᑐᖅᑕᐅᑦᑕᐃᓕᖁᓪᓗᒋᑦ ᑭᖑᕙᕐᓃᑦ ᐃᑲᔪᖅᑐᐃᑎᓪᓗᒋᑦ ᐱᕋᔭᒃᑕᐅᓯᒪᔪᓂᒃ ᐊᒻᒪ ᐊᓐᓇᒃᓯᒪᔪᓂᒃ ᑕᒪᑐᒪᙵᑦ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ (GBV), ᓴᖅᑮᓯᒪᓪᓗᓂ ᑭᖑᕙᕐᓂᕐᒥᒃ ᐊᒻᒪ ᐊᑐᖅᑕᐅᓪᓗᐊᙱᑦᑐᒥᒃ ᐊᑯᓂᐅᔪᒃᑯᑦ ᓇᒡᓕᒃᓵᖅᖢᑎᒃ. ᐱᕆᖃᑎᒌᖃᑎᖃᖅᑐᑎᑦ ᐱᓕᕆᖃᑎᓪᓗᐊᑕᖏᓐᓂ ᐊᒻᒪ ᑎᒍᒥᐊᖅᑎᐅᖃᑕᐅᔪᓂᑦ, ᒪᓕᒐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕘᒥ ᓴᑐᑭᒧᐊᖅᑎᑦᑎᓯᒪᔪᑦ ᐱᓕᕆᑎᑦᑎᓪᓗᑎ ᓴᖅᑭᖅᑎᑕᐅᓂᖏᓐᓄᑦ “ᑭᓱᓕᕆᔾᔪᑎᓄᑦ ᐅᖃᓕᒫᒐᐃᑦ”. ᑖᓐᓇ ᐱᓕᕆᔾᔪᑎ ᑐᕌᒐᖃᖅᑐᑦ ᐱᕙᓪᓕᐊᑎᑦᑎᓗᑎᒃ ᐊᓯᔾᔨᕐᓂᕐᒥᒃ ᐃᓗᐊᓂ ᒪᓕᒐᓕᕆᓂᐅᑉ ᑲᒪᒋᔭᐅᖁᓪᓗᒋᑦ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐋᓐᓂᖅᑕᐅᖃᑦᑕᕐᓃᑦ (GBV) ᓴᖅᑮᓂᒃᑯᑦ ᐊᒻᒪ ᐋᖅᑭᐅᒪᑏᓐᓇᕐᓗᒋᑦ ᐅᒃᑯᐃᖓᔪᑦ ᐅᖃᖃᑎᒌᖕᓂᐅᔾᔪᑕᐅᔪᓐᓇᖅᑐᑦ ᑖᒃᑯᓇᓂ ᐊᒥᓱᒐᓚᖕᓂ-ᓇᐅᒃᑯᑐᐃᓐᓇᖅ ᐱᔨᑦᑎᕋᖅᑎᓄᑦ. ᑐᑭᓯᒋᐊᕈᑎᓗᒃᑖᑦ ᓄᑖᙳᕆᐊᖅᑕᐅᖃᑦᑕᕐᓂᐊᖅᑐᑦ ᒪᕐᕈᐊᖅᑎᖅ-ᐊᕐᕌᒍᒥ ᐃᑲᔫᑎᒃᓴᑦ ᑕᒻᒪᖅᓯᒪᙱᑦᑎᐊᖁᓪᓗᒋᑦ ᐊᒻᒪ ᐊᒃᑐᐊᓂᖃᐃᓐᓇᖁᓪᓗᒋᑦ.
ᒫᓐᓇ, ᓴᖅᑮᓯᒪᔪᒍᑦ ᐋᑐᕚᒥ ᐊᒻᒪ ᒪᓐᑐᕆᐊᒥ ᕿᒥᕐᕈᐊᒐᕐᓂᒃ, ᓴᖅᑭᑕᐅᓪᓗᑎᒃ ᓄᓇᕗᒻᒧᑦ, ᑐᕌᓐᑐᒧᑦ, ᕗᐃᓂᐸᐃᒡᒧᑦ, ᐃᐊᑦᒥᓐᑕᓐᒧᑦ, ᐊᒻᒪ ᔭᓗᓇᐃᕝᒧᑦ ᐊᑐᖅᑕᐅᓛᖅᖢᑎᒃ ᐅᑭᐊᒃᓵᖓᓂ 2025-ᒥ.
ᐃᖅᑲᓇᐃᔭᕐᕕᖕᒥᑦᐸᕝᕕᓵᕆᑦᑕᐃᓕᒪᓂᖅ
ᐱᓕᕆᐊᖅ ᕿᓂᖅᑐᖅ ᐃᓕᓐᓂᐊᖅᑎᑦᑎᓂᕐᒥᒃ ᐃᓄᖕᓂᒃ ᐊᔾᔨᒌᙱᑐᓂᒃ ᐃᖅᑲᓇᐃᔭᕐᕕᖕᒥ ᐸᒡᕕᓴᒃᑕᐅᓃᑦ ᐊᒻᒪ ᐋᓐᓂᖅᑕᐅᓃᑦ ᒥᒃᓵᓄᑦ, ᐃᒪᐃᒃᑲᓗᐊᕈᑎᒃ ᑐᙵᕕᖃᕐᓗᑎᒃ ᐊᕐᓇᐅᒐᓗᐊᕈᓂ ᐊᖑᑕᐅᒐᓗᐊᕈᓂ ᐅᕝᕙᓘᓐᓃᑦ ᐊᓯᖏᑦᑎᒍᑦ ᐃᓚᐃᓐᓈᖅᑕᐅᓂᒃᑯᑦ. ᖄᒃᑲᓐᓂᐊᒍᑦ, ᑐᕌᒐᖃᖅᑐᑦ ᑐᑭᓯᑎᑦᑎᓗᓂ ᐃᓄᖕᓂᒃ ᐱᔪᓐᓇᐅᑎᖏᓐᓂᒃ ᐊᒻᒪ ᐱᓕᕆᐊᒃᓴᖏᓐᓂᒃ, ᐊᒻᒪᓗ ᐊᑐᐃᓐᓇᐅᑎᑦᑎᓗᓂ ᐃᑲᔪᖅᑕᐅᓂᕐᒥᒃ ᑕᐃᒃᑯᓄᖓ ᐊᑐᖅᓯᒪᔪᓄᒃ ᐅᕝᕙᓘᓐᓃᑦ ᖃᐅᔨᒪᔪᓄᑦ ᑕᐃᒪᐃᓕᐅᖅᑕᐅᕙᒃᑐᓂᒃ ᐸᒡᕕᓴᒃᑕᐅᓂᕐᒥ.
ᐊᑐᖅᖢᒋᑦ ᐊᔾᔨᒌᙱᕈᓘᔭᖅᑐᑦ ᐱᓕᕆᓇᓱᐊᕐᓃᑦ ᐱᖃᓯᐅᔾᔨᓯᒪᔪᑦ ᐃᓄᓕᒫᓂᒃ ᐃᓕᓐᓂᐊᖅᑎᑦᑎᓂᕐᒥᒃ, ᓇᔫᑎᓗᑎᒃ ᐃᓕᓐᓂᐊᕐᓗᑎᒃ ᑲᑎᒪᓗᑎᒃ, ᐊᒻᒪ ᐱᓕᕆᓇᓱᑦᑎᐊᕐᓂᒃᑯᑦ ᐊᑭᓕᖅᓱᖅᑕᐅᓇᑎᒃ ᐱᓕᕆᓃᑦ ᒪᓕᒐᖅᑎᒍᑦ ᐃᑲᔪᕐᓃᑦ, ᓄᓇᕗᒻᒥᐅᑦ ᑐᑭᓯᒋᐊᕈᑎᖃᕐᓂᖅᓴᐅᔪᓐᓇᖅᑐᑦ ᖃᓄᖅ ᑲᒪᒋᔭᐅᔪᓐᓇᒪᖔᑕ ᐃᖅᑲᓇᐃᔭᕐᕕᖕᒥ ᐸᒡᕕᓴᒃᑕᐅᓃᑦ ᐊᒻᒪ ᐋᓐᓂᖅᑕᐅᖃᑦᑕᕐᓃᑦ. ᑕᒪᒃᑯᐊ ᐱᓕᕆᓇᓱᖕᓃᑦ ᐋᖅᑭᒃᓱᖅᑕᐅᓯᒪᔪᑦ ᖁᐊᖅᓵᖅᓯᒪᔪᓂᒃ-ᑐᑭᓯᐅᒪᓂᖅ ᐊᒻᒪ ᑲᒪᒋᓗᒋᑦ ᓇᓕᐊᓪᓚᑦᑖᑦ ᐊᑐᖅᑕᐅᓯᒪᔪᑦ ᓄᓇᕗᒻᒥᐅᓂᑦ. ᑕᐃᒪᓐᓇ, ᐱᓕᕆᐊᖅ ᕿᓂᖅᑐᖅ ᐃᑲᔪᖅᑐᐃᔾᔪᑎᓂᒃ ᑕᐃᒃᑯᓄᖓ ᐊᑐᖅᓯᒪᔪᓂᒃ ᐸᒡᕕᓴᒃᑕᐅᓂᕐᒥ ᐅᕝᕙᓘᓐᓃᑦ ᐋᓐᓂᖅᑕᐅᓂᕐᒥᒃ ᐅᕝᕙᓘᓐᓃᑦ ᖃᐅᔨᒪᒍᑎᒃ ᑭᓇᑐᐃᓐᓇᒥᒃ ᑕᐃᒪᐃᑕᐅᓯᒪᔪᒥᒃ.
ᐃᓕᑕᕆᔭᐅᔭᕆᐊᓖᑦ
ᐊᒥᓱᑦ ᖁᔭᒋᔭᐅᔪᑦ ᐊᑕᖏᖅᖢᑎᒃ ᒐᕙᒪᓕᕆᔩᑦ ᐊᒻᒪ ᒐᕙᒪᒃᑯᓐᓂᐅᙱᑦᑐᖅ ᑎᒥᐅᔪᑦ, ᒪᓕᒐᓕᕆᓂᕐᒧᑦ ᑲᑎᒪᔩᑦ, ᐊᒻᒪ ᐃᖅᑲᓇᐃᔭᕐᕕᖏᑦ ᐃᖅᑲᓇᐃᔭᖅᑎᖏᓪᓗ ᐃᑲᔪᖅᑐᐃᓯᒪᔪᑦ ᐱᓕᕆᐊᖑᓇᓱᒃᑎᓪᓗᒋᑦ ᐊᑐᐃᓐᓇᖃᖅᑎᑦᑎᓂᖅ ᒪᓕᒐᓕᕆᓂᕐᒥᒃ. ᐱᓕᕆᔪᒪᓪᓚᑦᑖᕐᓂᖏᓐᓄᑦ ᐊᒻᒪ ᑐᓴᐅᒪᖃᑎᒌᒍᒪᓂᕐᒧᑦ ᑐᑭᓯᒋᐊᕈᑎᓂᒃ ᐊᒻᒪ ᖃᐅᔨᒪᓂᓪᒪᑦᑖᖏᓐᓂᒃ ᑕᐃᒪᐃᓕᐅᕈᓐᓇᖅᓯᓯᒪᕗᒍᑦ ᐊᑐᕐᓗᒍ ᐱᒻᒪᕆᐅᔪᖅ ᐊᑐᖅᑕᐅᕙᓪᓕᐊᔪᖅ. ᐊᔾᔨᐅᙱᑦᑐᒥᒃ ᐃᓕᓴᕆᔭᐅᓂᖃᖅᑐᑦ ᐊᒥᓱᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᖅᑏᑦ ᐊᓂᒍᖅᑐᓂ ᐊᕐᕌᒍᓂ ᐃᑲᔪᕐᔪᐊᖅᓯᒪᓂᖏᓐᓄᑦ ᐱᓕᕆᐊᖅ ᑕᒪᓐᓇ ᓯᕗᒻᒧᐊᒃᐸᓪᓕᐊᑏᓐᓇᖅᖢᒍ.
